மாமன்னன் படம் வந்த பிறகு அதில் நடித்த வடிவேலு, உதயநிதி ஸ்டாலின் ஆகியோரைவிட அதிக ரசிகர்களைக் கவர்ந்திருக்கிறார் பகத் பாசில். படத்தில் ஜாதித் திமிர் பிடித்த வில்லன் ரத்னவேலுவாக வாழ்ந்திருக்கும் பகத் பாசிலை கொண்டாடித் தீர்க்கிறார்கள் ரசிகர்கள். அதிலும் ஓடிடியில் மாமன்னன் வந்த பிறகு சமூக வலைதளங்களில் இவர்தான் ஹாட் டாபிக்.
இப்படி மலையாள பட உலகில் இருந்து தமிழகத்துக்கு வந்து ரசிகர்கள் மனதில் இடம்பிடித்த பகத் பாசிலைப் பற்றி அதிகம் தெரியாத சில விஷயங்கள்…
தமிழகத்தின் இளைய தளபதியான விஜய்க்கும், பகத் பாசிலுக்கும் இடையே நிறைய ஒற்றுமைகள் உள்ளன. இருவரும் போராடி முன்னுக்கு வந்தவர்கள். இருவரின் அப்பாவும் பெரிய இயக்குநர்கள். தமிழகத்தில் எஸ்.ஏ.சந்திரசேகர் கொடுத்ததைப் போல் பகத் பாசிலின் அப்பா பாசில், மலையாளத்தில் நிறைய ஹிட் படங்களைக் கொடுத்திருக்கிறார்.. இன்னும் சொல்லப்போனால் விஜய்க்கே ஒரு திருப்புமுனையைக் கொடுத்த படமான ‘காதலுக்கு மரியாதை’ படத்தை இயக்கியவர் பாசில்.
19-வது வயதில் அப்பா பாசிலின் இயக்கத்தில் ‘கையெத்தும் தூரத்து’ என்ற படத்தின் மூலம் மலையாள திரையுலகில் அறிமுகமானார் பகத். இப்படத்தில் நடிக்கும்போது அவரது பெயர் ஷானு. ‘கையெத்தும் தூரத்து’ படம் எதிர்பார்த்தபடி போகவில்லை. பிளாப் ஆனது. அதனால் திரையுலக பயணம் தனக்கு செட் ஆகாது என்று முடிவெடுத்த பகத் பாசில், படிப்பில் கவனத்தை திருப்பினார். அமெரிக்கா சென்ற பகத், மியாமி பல்கலைக்கழகத்தில் எம்.ஏ.பிலாசபி படித்தார். அதேநேரத்தில் நடிப்பின் மீதான அவரது ஆர்வம் குறையவில்லை. 7
ஆண்டுகள் கழித்து திரும்பி வந்தவர், ‘கஃபே’ என்ற ஆந்தாலஜி படம் மூலம் மீண்டும் திரையுலகுக்கு வந்தார். இதில் தன் பெயரை பகத் பாசில் என்று மாற்றிக்கொண்டார். இந்த படம் 2009-ம் ஆண்டில் வெளியானது.
விஜயகாந்த்துடன் ‘செந்தூரபாண்டி படத்தில் நடித்த பிறகுதான் விஜய்யின் கிராப் ஏற ஆரம்பித்த்து. அதே பாணியில் மம்முடியுடன் ‘பிரமாணி’ என்ற படத்தில் நடித்த பிறகுதான் பகத் பாசிலின் கிராப் மலையாளத்தில் ஏற ஆரம்பித்தது. இந்தப் படம் 2009-ம் ஆண்டில் வெளியானது.
தமிழில் ‘ராஜா ராணி’ உள்ளிட்ட பல படங்களில் நடித்த நஸ்ரியாவை 2014-ம் ஆண்டில் திருமணம் செய்துகொண்டார் பகத் பாசில். திருமணத்தின்போது பகத் பாசிலுக்கு 30
வயது. நஸ்ரியாவுக்கு 19 வயது. இருவருக்கும் இடையே 11 வயது வித்தியாசம். இந்த திருமணத்தைப் பற்றி தனது முகநூல் பக்கத்தில் பகிர்ந்த பகத் பாசில், “என்னை திருமணம் செய்துகொள்வது எந்த பெண்ணுக்கும் சவாலான விஷயம். இந்த சவாலை ஏற்றுக்கொள்ள ஒரு பெண் முன்வந்திருக்கிறாள். நஸ்ரியாதான் அந்தப் பெண். இன்று எங்களுக்கு நிச்சயதார்த்தம் நடைபெற உள்ளது. இது பெற்றோர் பார்த்து நடத்திவைக்கும் திருமணம்” என்று குறிப்பிட்டுள்ளார்.
நஸ்ரியாவை திருமணம் செய்துகொள்வதற்கு முன் நடிகை ஆண்ட்ரியாவை பகத் பாசில் காதலித்துள்ளார். ஆனால் அவரது காதலை ஆண்ட்ரியா ஏற்கவில்லை.
2013-ம் ஆண்டில் பத்திரிகை ஒன்றுக்கு அளித்த பேட்டியில் இதைப்பற்றி பகத் பாசில் கூறியிருக்கிறார். ஆண்ட்ரியாவின் அழகும், அவரது இசை ஆற்றலும், புத்திசாலித்தனமும் தன்னை அவர் பக்கம் ஈர்த்த்தாக அந்த பேட்டியில் சொல்லியிருக்கும் பகத் பாசில், ஆண்டிரியா தன் காதலை நிராகரித்த பிறகு, அதிலிருந்து மீண்டுவர தனக்கு பல நாட்கள் ஆனதாக குறிப்பிட்டுள்ளார்.
விக்ரம் 2, புஷ்பா, மாமன்னன், வேலைக்காரன் ஆகிய படங்களில் ஆக்ஷன் வேடங்களில் பார்த்த ஆக்ரோஷமான நடிகரான பகத் பாசிலுக்கு காதல் படங்களில் நடிப்பதும் ஈஸியான விஷயம். மலையாள திரையுலகில் மிக நீண்ட முத்தக் காட்சியில் நடித்த நடிகர் என்ற பெருமை பகத் பாசிலுக்கு இருக்கிறது. ‘சாப்ப குரிசு’ என்ற படத்தில் நாயகி ரம்யா நம்பீசனுடன் அந்த மிக நீண்ட லிப் லாக் முத்தக் காட்சியில் நடித்திருக்கிறார் பகத்.
ஹோமோசெக்ஸ் எனப்படும் தன்பாலின ஈர்ப்பாளர்களின்
ஆதரவாளர் பகத் பாசில். இதுபற்றி ஒரு பத்திரிகைக்கு பேட்டி அளித்துள்ள பகத் பாசில், “காதல் விஷயத்தில் ஒவ்வொருவருக்கும் அவர்களுக்கான விருப்பம் இருக்கிறது. அதில் நாம் தலையிடக் கூடாது. அவர்கள் உணர்வை நாம் மதிக்க வேண்டும். நாளை என் மகன், தான் இன்னொரு ஆணைக் காதலிப்பதாக கூறினால் நான் அதை எதிர்க்க மாட்டேன்” என்று கூறியுள்ளார்.
தென்னிந்தியா முழுக்க அனைத்து மாநில மக்களாலும் நேசிக்கப்பட்டாலும், அதற்கு ஏற்ப பகத் பாசிலின் சம்பளம் ஏறவில்லை. ஒரு படத்தில் நடிக்க அதிகபட்சமாக 6 கோடி ரூபாயை மட்டுமே சம்பளமாக வாங்குகிறார் பகத் பாசில். அதே நேரத்தில் ஒரு கதை அவருக்கு மிகவும் பிடித்துப் போய், அதில் நடிக்க சம்பளம் ஒரு தடையாக இருந்தால், தன் ஊதியத்தை 3.5 கோடி ரூபாய்வரை குறைத்துக்கொள்ள அவர் தயங்குவதில்லை. மாமன்னன் படத்துக்கு அவர் 3 கோடியை மட்டுமே சம்பளமாக வாங்கியதாக கூறப்படுகிறது. சிறந்த வேடத்துக்காக சம்பளத்தைக் குறைத்துக்கொள்வது அவரது வெற்றிக்கு மிக முக்கியமான காரணம்.
No comments:
Post a Comment